शनि जयन्ती

जीवनका समस्त सुखदुःख, जयपराजय आदि विषय नवग्रहमा आधारित छन्। यी नवग्रहमध्ये शनिश्चरलाई सन्तुलन र न्यायका देवता मानिन्छ । हामीले प्रचलन गर्ने गरेको पञ्चाङ्गअनुसार प्रत्येक वर्ष ज्येष्ठ महिनाको अमावस्या(औंसी) तिथिका दिन 'शनि जयन्ती' मनाउने गरिन्छ । यस पटकको शनि जयन्ती आज २०७५ साल जेठ ०१ गते मङ्गलवार अर्थात् मई १५, २०१८ का दिन परेको छ । शनिलाई ग्रहसमूहको क्रूर न्यायाधीशका रूपमा गणना गरिन्छ । शनि देवताको क्रोध र रिस कडा हुन्छ भन्ने मान्यता छ, खासगरी शनिको दृष्टिलाई ज्योतिषशास्त्रमा महत्त्वकासाथ विश्लेषण गर्ने गरिन्छ । शनिदेवले खराब आचरणमा रहेका व्यक्तिलाई मौका पर्नासाथ अति कठोरतापूर्वक सजाय गर्दछन् । शनि ग्रहको कुदृष्टिको प्रभावले एउटा राजालाई रातारात भिखारी बनाउने गर्दछ, यद्यपि शनिको शुभ दृष्टि प्राप्त हुँदा एउटा भिखारी राजातुल्य सम्पन्न र सम्मृद्ध बनाइदिन्छ । जन्मकुण्डलीमा शनि ग्रहको अशुभ प्रभाव हुँदा यसका कारण व्यक्तिलाई निर्धन, अल्छी, दुःखी, कमजोर, शक्तिहीन, व्यापारबाट घाटा ब्यहोर्ने, लागुपदार्थको भोगी, अल्पायु, निराशावादी, जुवारी, कानको रोगी, कब्जियतको समस्या, जोर्नीको समस्या, उदासीन, नास्तिक, बेइमान, तिरस्कृत, कप्टी, अधार्मिक तथा मुद्दामामिला र चुनावमा हार व्यहोर्ने आदि स्थितिको सिर्जना हुन्छ। शनि देव तपाईंको जन्मकुण्डलीमा अशुभ फलकारकका रूपमा रहेको छ भने निम्न उपायहरूको प्रयोग गरी शुभ लाभ प्राप्त गर्न सक्नुहुन्छ -

वैदिक मन्त्र -
ॐ शन्नोदेवीरभिष्टय आपोभवन्तु पीतये। शंय्यो रभिस्रवन्तु नः।

पौराणिक मन्त्र -
ॐ नीलाञ्जन समाभासं रविपुत्रं यमाग्रजम्। छायामार्तण्डसम्भूतं तं नमामि शनैश्चरम्।।

तन्त्रोक्त मन्त्र -
ॐ प्रां प्रीं प्रौं सः शनैश्चराय नमः।

शनि गायत्री -
ॐ भगभवाय विद्महे मृत्युरुपाय धीमहि तन्नो सौरिः प्रचोदयात्।

जप संख्या - २३०००

दानादिका लागि आवश्यक सामाग्री -
फलाम, तिल, कालोमास, तोरीको तेल, कालो वस्त्र, कालोगाइ, फलामबाट बनेको भाँडो, जुत्ता, भैंसी, कस्तूरी, सुन, नरिवल, कालो वा नीलो फूल।

रत्न -
शनिको शुभ फल प्राप्त गर्न नीलम रत्न धारण गर्ने गरिन्छ। तर शनिको रत्न फाप्नेनफाप्ने विषयमा ज्योतिषीसित परामर्श गर्नु आवश्यक छ, वास्ता नगरी धारण गर्दा निलम रत्नले तुरुन्त अनिष्ट फल प्रदान गर्दछ।

अन्य उपाय -
शनिवारका दिन व्रत लिनुपर्दछ। शिव स्तोत्र वा शनि स्तोत्रको पाठ गर्नु पर्दछ। शनिको यन्त्र धारण गर्नुपर्दछ । हनुमानको उपासनाबाट पनि लाभ प्राप्ति हुन्छ। चराचुरुङ्गी र माछालाई खानेकुरा प्रदान गर्नु र माछामासु खानु हुँदैन।

के के गरेमा राम्रो हुन्छ ? शनि जयन्तीका दिन

१) शनि ग्रहको तान्त्रिक मन्त्र, वैदिक मन्त्र, पौराणिक मन्त्र, महाकाल शनि मृत्युञ्जय मन्त्र र महामृत्युञ्जय मन्त्रको स्वयं आफैले वा परिवारका सदस्यद्वारा जाप गर्नुपर्दछ।

२) शनि ग्रहका लागि निर्धारण गरिएका दानसामाग्रीहरू आफ्नो गच्छेले भ्याएसम्म जुटाएर दान गर्नुपर्दछ।

३) शनि ग्रह निम्नवर्ग, पीडित, दुःखी र निर्धाहरूको प्रतिनिधि र प्रतीकका रूपमा पुजिने ग्रह हो। त्यसैले उक्त वर्गका सामान्य जनसमूहको सेवासम्मान र पूजा गरेर शनिलाई प्रसन्न तुल्याउनु पर्दछ।

४) कुनै जाप वा अनुष्ठान सम्पादन गर्न नसक्ने व्यक्तिले शनि जयन्तीका दिन कुनै फलामको भाँडोमा तोरीको तेल भरेर त्यसको छायामा आफ्नो अनुहार हेरेर त्यसलाई एउटा आँकको बोटको फेदमा त्यो तेल खन्याएर त्यसलाई माटोले छोपिदिएमा शनि ग्रहका अशुभ फललाई निवारण गर्न सकिन्छ। यसरी प्रयोग गरिएको फलामको भाँडो तल्लो निम्न वर्गका व्यक्तिलाई दान गर्नु पर्दछ।

भगवान् शनिदेवलाई प्रसन्न तुल्याउन यहाँ थिचेर शनि स्तोत्र पाठ गर्न र सुन्न सक्नु हुनेछ ।